طب ماشى حضرتك قاعد معايا انا ليه ؟
نزلت كالعاده اقعد على القهوه مع الواد شاهين باليل او نرغى فى ايى حاجه و خلاص
بعد لما اتفاجأت ان حياتى بقت كلها منصبه حول عمليه الدستور و الانتخابات
استربعت فى الركن بتاعى فى القهوه و حولت اتناسى انى اطلقت عليها قهوه المختلين عقليا او مستشفى الامراض العقليه
وقلت للواد شاهين النهارده مافيش سياسه و اتفقنا اننا منتكلمش فى السياسه خالص
بعد حوالى تلت ساعه قاعدين ساكتين علشان نمسك نفسينا حصلت طبعا الحاجه الكبيره
دخل علينا واحد لابس ابيض فى ابيض و خير الله اما اجعلوه خير دخل علينا زى القضاء المستعجل
ليه معرفش بس يمكن شاف فينا كم البلاهه المطلوب علشان نصدقه
سحب كرسى و قعد معانا و ابتدى بقى يلت و يعجن
و قوم ايه قالك لازم نختار مرشد اسلامى
قالك احنا البلد حتضيع من ادينا قولت فى عقل بالى ايه الهكسوس جايين تانى ولا ايه
انا قولت اطمن برضه لو جايين اكلم امى تعملى سندوتشات علشان نلحق الحرب
قوم انا علشان فهمى على قدى و عبيط حبتين سألته طب يا عم الاستاذ الشيخ
هو يعنى ايه مرشح اسلامى ؟ علشان لو حد سألنى ميبقاش شكلى وحش لامؤاخذه ولا حاجه
عم الحج الاستاذ الشيخ بص للواد شاهين و قاله هو صاحبك ده عبيط ولا ايه ؟
شاهين رد بمنتهى التلقائية لا مش عبيط ده محمود
انا قولت يا واد طنش خالص
قوم عم الشيخ قعد يفهمنة يعنى ايه مرشح اسلامى
قد عم الاستاذ الشيخ قالى اسلامى يعنى يكون مسلم حيحكم بشرع الله
طبعا انا اتسحبت من لسانى و قولت له طب ما كل المرشحين مسلمين ايه المشكله
قالى انت مش فاهم حاجه و الهباب الشاى اللى بتشربه ده مبوظلك دماغك
بصراحه انا خفت و سبت الشاى لايكون حد حط فيه حاجه ولا حاجه
يا ابنى المهم انه يحكم بشرع الله
وطبعا علشان انا غبى و مش فاهم سالته يعنى هو حيجيب قوانين من عنده ولا من مجلس الشعب ؟
قالى لا مهو المرشح الاسلامى حيجبر مجلس الشعب انه يحط قوانين اسلاميه
و لشده غبائي سألته هو حيجبرهم ازاى هو مش المجلس ده ديموقراطى ولا ايه ؟
قالى ما هى الديموقراطيه دى اللى حتودينا فى داهيه انشاء الله
يا ابنى المرشح الاسلامى طبعا احسن
و كالعاده اتسحبت من لسانى هو حضرتك الباقيين دول مش مسلمين برضه ولا ايه
اصل انا صاحى متأخر و معرفش
قالى لأ دول مسلمين اسم بس
يعنى ايه يا عم الشيخ نورنى وحياة ابوك
يعنى حاجه كده زى ما تقول مسلمين مودررن
انت شكلك علمانى و حتقعد تجادل و خلاص
لا واللهى بس حضرتك انا نفسى اسألك سؤال ليه مهاتير محمد و رجب طيب اردوغان
و هما احسن امثله الحكم الاسلامى فى العصر الحديث محدش فيهم اعلن انه مرشح اسلامى و ان الباقين دول كفره و ولاد كلب ؟
و بأى حق انت بتكفر انسان و بتتهمه فى دينه لمجرد ترسيخ مصلحه مرشح لتيار معين ؟
و ليه بتنادى بالديموقراطيه اذا كنت اصلا ناوى تخالفها لو اختلفت مع اطماعك؟
و ليه فى اكتر من مرشح اسلامى اذا كانوا لا يطمعون فى السلطه
و هناك اختلافات فى التيارات الفكريه بينهم على الرغم من ان الاسلام واحد و كلهم لهم صفه المرشح الاسلامى؟
و ليه بتحاولوا انكوا تصفوا اى حد يهاجمكوا لشخصكوا انه يهاجم الدين
انا عايز واحد يتقى ربنا و يحكم بالحق و الكتاب و السنه ولا يرفع شعار مرشح اسلامى
يا ابنى افهم المرشح الاسلامى لما يكون الشيوخ راضين عنه يبقى اكيد حينفذ شرع الله
طب لما الشيوخ هما اللى حاينتخبه و لازم هما اللى يكونوا راضين عنه
طب ماشى حضرتك قاعد معايا انا ليه ؟
ليست هناك تعليقات:
إرسال تعليق