ايكش تولع
وانا مالى مليش دعوه !!!!! بس اصلى بحبها
ليه الشباب اللى عمل الثوره عمل ثوره رغم انه ماكنش يعرف حجم الفساد الحقيقى الموجود فى البلد و الناس اللى كانت عرفه حجم الفساد و ساكته هى اللى بتقود البلد الان؟
سوأل برئ
ليه واحد مسلم قابل واحد مسيحى ..........و نزلو فى بعض بوس
ليه على الرغم من ان المجلس العسكرى منع البوس ؟
ليه انا لسه ليا اصحاب مسيحين كتير رغم ان البلد كلها بتقول ان فيه فتنه طائفيه ؟
سوأل اهبل
ليه لما السجون اتفتحت و هربو المساجين محدش فتح سجن النسا ولا هى المرأه مهضوم حقها على طول؟
سوأل فاقع مرارتى
ليه الشيخ الشعراوى لم ينضم للاخوان رغم انه كان اعلم اهل مصر بصحيح الاسلام و لم يرى فيهم الحل ؟
سوأل عادى بس مش برئ
هل معقوله ان قصه الحب بين سوزان و مبارك توصل للقوه دى زى كده فيلم حبيبى دائما او
love story
لدرجه ان كل واحد فيهم لما ياخد ١٥ يوم حبس يحصلو نفس الاعراض؟
بردو سؤال برئ
ليه رغم اننا بقلنا كام شهر و تصدير الغاز واقف رغم كده لسه عندنا ازمه انابيب بوتاجاز امال لو رجعنا صدرنا تانى حيحصل ايه؟
وده برضه سوأل برئ
ليه فيه ازمه بنزين و سولار رغم ان مفيش اى داعى للازمه و رغم ان سيل السرقات قد توقف
وليه الازمه فقط فى بنزين ٨٠ و السولار بتاع محدودى الدخل علشان يلعن ابو الثوره ؟
وده كمان سوأل برئ
ليه الطرق زحمه و متنيله بنيله رغم ان تشريفه حبيب العدلى انتهت اللى كانت بتوقف المهندسين كلها ساعتين كل يوم و تشريفه رئيس الوزراء اللى كانت بتوقف المحور رغم انه مكنش بيعدى عليه بس بردو كانو بيقفله؟
سوأل عادى بس مش برئ
ليه فى فتنه طائفيه بعد لما مصر كلها عرفت ان اللى عمل تفجيرات كنيسه القدسين و حادث شرم الشيخ و بعديهم حادث كنيسه اطفيح كلهم من انجازات امن الدوله بتاع العدلى
هل احنا بالغباء ده ؟
سؤال برضه برئ
ليه طول عمرنا بنلجأ للعلاج فى الخارج رغم انه ارخص كتير لو جبنا العلاج للداخل ؟
سؤال بفتكره كل لما بتنيل اعيا
ليه مبارك كان اسمه داخل الحكومه و مجلس الشعب ولى النعم و ديه معلومه مؤكده ؟
سوأل رخم
ليه سوزان كانت مصره ان الشعب كله يقراء كتب اطفال و الشعب كله جعان رغم انه كان احسن بكتير لو عملت مشروع سندوشتات حلاوه بالقشطه للجميع ؟
سؤال بقالو ٢٠ سنه
ليه اللى بيشتغل فى فرع ٦ اكتوبر ساكن فى التجمع و الل بيشتغل فى فرع التجمع ساكن فى ٦ اكتوبر ؟
سؤال غبى
ليه التلفزيون تحول الى احد وسائل تنظيم الاسره او احد وسائل التعذيب للشعب المصرى رغم ان امن الدوله اتلغى ؟
سوأل برئ جدا
ليه يتعمد التلفزيون الحديث عن انه يجب ترك الفتنه و جميع من درس ولو جزء بسيط عن الرسائل الاعلاميه المقنعه يعرف انه بهذه الطريقه يثير الفتنه يعنى لما حد يقعد يقولك ان زيد من الناس بيحبك و اكيد مش قصده يضايقك
ولا يأذيك كل خمس دقايق فى الاخر حتقتنع انه اكيد لاء و كان قصده بقى ؟
ده بقى سوأل فقع مرارتى
ليه لحد دلوقتى محدش طلع يقولنا احنا دخلنا كام من بعد الثوره من قناه السويس و البترول و السياحه و مناجم الذهب بتاعه البحر الاحمر ؟
سوأل عادى جدا
ليه انتاج مناجم الذهب فى منطقه البحر الاحمر قبل الثوره اكبر من انتجها الان بعد الثوره رغم انه ايام الثوره كان فى طبعا سرقات و حجات كتير ؟
سوأل و السلام برئ مش برئ بقى مابقتش فارقه كتير
ليه كل الناس بتطالب برفع المرتبات و محدش خد باله ان الاسعار بترتفع بعد الاجور ب١٥ يوم بالضبط
سوأل برضه و خلاص
ليه مصر فيها واحد بتاع سيديهات مرشح نفسه فى الانتخابات؟
وانا مال امى انا محدش يجاوب على السوأل ده
ليه انا حارق دم امى كل يوم و بفكر ازاى بلدى تبقى احسن رغم ان فى ناس كتير بتدمر فى البلد يمكن علشان بحبها بجد بس الاهم انتا كمان بتحبها بجد ؟
اهو سوأل و السلام
ليه فى اسأله تانيه كتير من النوع ده بدور فى دماغى رغم انى مش منتمى لأى حزب او أئتلاف او جماعه
ليست هناك تعليقات:
إرسال تعليق