صباح الفل يا كبير
صباح الفل يا مواطن
صباح الفل سيدى الرئيس القادم الان فقط يمكننى ان اقول سيدى الرئيس بفخر اصل الى كان قبلك كان ايدك منه و الارض المهم يا ريس بلاش نجيب فى سيرة الناس منهم للقضاء و ربنا ينتقم منهم
بص بقى يا ريس انا المواطن يعنى انا الى معينك فى المكان ده يعنى أكيد مش معينك علشان توقفنى فى الشارع بالساعات قال ايه تشريفة اصلى فى الاخر مش كان ده هدفى والا كنت خليت اللى قبلك و خلاص و اهو اللى نعرفه احسن من اللى منعرفوش
بص بقى يا ريس انا عايز اطمن على اهلى و مستقبل عيالى اصلى من الاخر كده مش طماع بس على الاقل بقى عارف ان بكره احسن
والنبي يا ريس بدل ما بنصرف مليارات علشان الناس تتعالج بره طب منجيب العلاج هنا هو لازم الشحططه و وجع القلب
اه و صحيح يا ريس بلاش المدام تطلع كل كام يوم تعملنا مشروع جديد اصلى بصراحه مش فاكر انى انتخبتها معاك انا يا عمى معرفش غيرك و منتخبتش غيرك انت بقى اتجوزتها تبقى حاجه بتعتك انا مليش دعوه تطلع عين امى ليه
و صحيح يا ريس نفسى اسمعك كده و انت بتجلجل و بتقول ان قناه السويس بقت بالجنيه المصرى مش عارف ليه بس واللهى حتى ده لو كان حيضر البلد فى الاقتصاد كفايه انه حيحسسنى بقيمة بلدى اصل احنا يا ريس بعيد عنك بقالنا سنين مش حسين بقيمتنا بقولك ايه يا ريس لو عايزنى اصدقك يبقى بالصلاة على النبى كده تمشى شويه العوالم الى كانوا بيرقصوا لكل واحد شويه فى التلفزيون و ياجدع كفايه بقى كل يوم نشره انجازاتك و كلمتين بتوع حسب توجيهات السيد الرئيس اصل أكيد البلد فيها ناس تانية بردو بتفكر و تعرف تاخد قرار و ان كنت ناسى افكرك على رأى الست بس المرة دى حفكرك بميدان التحرير
يا ريس انا فى خدمة بلدى بس انا مش فى خدمتك جايز احبك و جايز لاء بس مضطر اتعاون معاك علشان بلدى يعنى من الاخر كده حد الله بينى و بينك غير حب الوطن يا حكومه
يا ريس هو ليه بيأخذوا منتجاتنا الزراعيه و يصدروها و انا باكل البواقى هو انا بنى ادم درجه تانية ليه ازرع و غيرى هو الى ياكل
و صحيح يا ريس انا الفترة الى فاتت عملت لنفسى كرامه بس محتاج منك انك تساعدنى احافظ عليها يعنى متسبنيش اتبهدل وانا بره
صحيح المثل بيقول من خرج من داره بس بردو فى مثل تانى بيقول الى جوزها يقولها ياعوره الناس تلعب بيها الكوره الا صحيح ليه الناس لما تجلنا بنعاملهم احسن معاملة و لما نروح لهم بيعاملونا انيل معاملة
ياريس نفسى اكل رغيف عيش بلدى عارف يعنى ايه بلدى ؟ يعنى مزروع فى ارض بلدى و مروى بدم و عرق ولدها اصل بصراحه القمح التانى ده مبيجيش الا بكسره العين وانا نفسى تبقى عينى مرفوعه فى التخين
ياريس انا فى ناس سرقت فلوسى عارف انك انت كمان اتسرقت معايا بس انت الكبير دلوقتى يبقى بقى جيبلى حقى و لو مش عارف يبقى اعدمهم او اقولك ارميهملى فى الميدان واحنا نعدمهم يإما يعدوا معانا و يدو لكل واحد حقه مانت عارف المصرى بيجيب حقه بدراعه
والنبى يا ريس بلاش قلة قيمه و بلاش نبيع ارضنا للغريب ده انت لو سافرت اى حته محدش حيرضى يبعلك ده الارض عرض يا كبير
والنبى يا ريس انا نفسى اركب الاوتوبيس انا عندى عربيه بس واللهى لو لقيت مواصلات محترمه لاركنها ده حتى اوفر الواحد يقعد باشا فى الاوتوبيس و السواق يوصله لاقرب حته
عارف يا ريس انا كنت عايز اجبلك هديه تنور طريقك بس للاسف ملقتش غير فوانيس رمضان صينى كان نفسى اجبلك حاجه بلدى بس حتى ديه بقت عزيزه دلوقتى
اصل بعيد عنك احنا معندناش صناعه خلاص اخر حاجه مصرى افتكرها كانت البجامات الكستور و الجل اصلى كنت صغير و يمكن افتكر العربيه ال ١٢٨ بتاعه شركه النصر واللهى كنت بحبها علشان بجد بتاعة بلدى
ياريس ليه متعملش وزاره الأقتصاد دى معاها وزاره التصدير و الاستيراد يعنى علشان محدش الشيطان يوزه و يستورد اى كلام فارغ و اهو بردو تكون هى بقى الى مسئوله عن تصريف منتجاتنا بره اصل احنا حتى لما بننتج يا حد بيستورد حاجه زيها و يضربنا يا اما مبنعرفش نصدرها ياريس انا لسه عايز حاجات تانية كتير بس مش عايز اعطلك بس والنببى افتكر لو مره بلاش كل اسبوع بس كل شهر تقعد معايا وتفهمنى واللهى حقعد ساكت اسمعك و بس و لو عندى حاجه حقولها بعد لما تخلص اصلى متربى و متعلم احترم الكبير
و بعدين يا ريس حتى لو بنحبك وحياه ابوك متطولش معانا اصل بردو المثل بيقول يابخت من زار و خفف و مش عايز اضطر اجيلك تانى عشان امشيك من هناك
انا معاك يا ريس علشان مصلحه البلد دى بس مش علشان مصلحتك انت
و صباح الفل يا كبير
افتكر بس انك قاعد هنا ايجار جديد يعنى عقدك يخلص و حتمشى
ليست هناك تعليقات:
إرسال تعليق