الانفجار طلع فشنك يا قلل
تصدق ابوك برضه كان كده
فضل يستغبى يستغبى لحد لما طلع له ديل و اتحول لحمار
وقال بيقولك طياره كسرت حاجز الصوت
الله يخرب بيوتكوا حنصلحه منين دلوقتى و هى مصاريف على الفاضى
ولا هو الشعب ناقص مصاريف
مش بعيد بكره يعملوا ضريبه جديده علشان نصلح حاجز الصوت و حاجز الامواج بتاع فيلل الوزراء فى مارينا
بعدين يقولك طياره معاديه يعنى معاديه وصلت لحد القاهره ازاى
و لا ممكن تكون طياره معاديه من الفيوم ؟
اصل بتوع الفيوم انا عارفهم ممكن يكونوا عايزين يحتلوا مصر
بس انا واثق فى رجاله الصف و العياط و ربنا معاهم بقى
و بعدين يطلع يقولك اصل الصوت ده علشان فى كوبرى وقع فى المعادى
طب يقع فى المعادى يسمع فى الدقى ليه و هنا بقى يجى دور الاجابه الشهيره العالم اصبح قريه صغيره
و طبعا يطلع واحد بسرعه يقول هى العلمانيه الله يخرب بيوتكم شوفتوا بقى العلمانيه بتعمل ايه
يا عم علمانيه ايه دى اسمها عولمه
اهو انتوا كده لازم تقوحوا فى كل حاجه الشيخ قال علمانيه يبقى علمانيه و برضه الله يخرب بيوتكم
و يطلع تصريح من واحد قبطى يقول انه لازم فرض الحمايه على مصر
علشان السلفين بيضربوا الاقباط بالطيارات
و بسرعه يطلع واحد او اتنين من الاخوان بتصريحات جديده
بتقول انى اللى حصل ده غضب من ربنا لان واحد من الاخوان جاله اسهال و محدش لحقه
و يطلع عبقرى تهريب و سرقه الاثار يقول انه اللى حصل ده
بسبب ان فى حد تانى نفخ فى البوق بتاع توت عنخ امون بس المره دى ما نفخش فيه ببقه !!!
و بصرعه يتهم الامن ان اهالى الشهداء هما سبب الصوت ده لانهم قربوا يفرقعه من غيظهم
و النائب العام يقرر التحقيق فى الموضوع و منع النشر فيه حتى لا يؤثر على سير التحقيقات
و يقرر اخلاء سبيل بقية وزراء الصيع و بلطجيه الداخليه
و طبعا ينتشر الامن المركزى و يقول ان ده كان عمليه استهداف لوزاره الداخليه
و محاوله لتهديد استقرار وسلامه المتظاهرين فى ميدان التحرير
و يتهم اهالى المتظاهرين القضاء انه هو السبب فى صوت الانفجار
و هذا الصوت ناتج عن البمبه اللى فرقعها لهم فى موضوع قتله الشهداء
و يتضح فى النهايه ان ده مجرد تجربه لمدفع رمضان
او ان الموضوع كله مفتعل لاثاره خوف الناس من يوم 8 يوليو بس على فكره برضه نازل و طز
ليست هناك تعليقات:
إرسال تعليق