جحا و الرئيس القادم
جحا مرشح الرئاسه القادم
الاسم : جحا المصرى
الجنسيه: بص فى الاسم وانتا تعرف
النوع : كلك نظر اكيد الشنب ده مش على سوسن
السن : من ايام فحت البحر
الخبرات السابقه : صايع قوى و ناصح و افهمها و هى طايره و رئيس جمهوريه نفسى
الحاله الاجتماعيه: اعزب امال بطنطت عليكو ليه اصلى معنديش حد يشبشبلى و يقولى خلى الولا جيمى رئيس يا جحجوحتى
يعنى اعزب و ناوى يعول ٨٥ مليون مصرى
و اهو كله بثوابه
طبعا بما انى جحا و طول عمرى نوير و فهلوى اكيد عندى برنامج انتخابى اخر فللى
اولا السياسه الخارجيه : احب اوضح السياسات اللى حتبعها :
١ - يا نحله لاتقرصينى ولا عايز عسل منك
وده بقى انا عاملوا للصين و البضاعه الصينى
٢ - من خرج من داره اتقل مقداره
يعنى انا مش حسافر اروح لاى بلد تانى لاتقولى بقى زياره ولا كلام فارغ احنا ورانا هم ما يتلم هنا يا عم الحج اللى عايز يشرفنا يتفضل و ياخد واجبه كمان
٣ - الباب اللى يجيلك منه الريح سده و استريح
ده بقى مخصوص لاسرائيل و الغاز و الكلام ده
٤ - و يا مفرقين الهدايا انتو ناس شربات لو جبتوا تانى هدايه مش حقول غير هااااات
و ده حطبقه مع اي خد يفتكر انه كاسر عينى بقرشين بيصرف بيهم علينا يعنى امريكا و الاتحاد الاروبى
السياسات الداخليه :
١ - الشطره تغزل برجل حمار
و طبعا محدش يجى نحية الحمار بتاعى والا حخرب بيته
٢ - الى تغلب به العب به
وده مش عارف لزمته ايه بس يمكن ينفع
٣ - القرش الابيض ينفع فى اليوم الاسود
و بما ان ايامنا بقت كلها سوده انا حطبع عمله جديده لونها ابيض
اهم القرارات طبعا اللى حاخدها اول ما اتعين
حغير اسم شرم الشيخ و اسميها طره علشان محدش يفتكر اننا محبسناش الرئيس السابق
انا حعمل مجلس الوزراء فى ميدان التحرير ممكن فى المجمع علشان الوزراء يبقى منهم للشعب على طول
و على طلعه كل شهر حلم الوزراء كلهم و احطهم فى الميدان يوم الجمعه و اللى نفسه فى حاجه و مخنوق من واحد فيهم يبقى يروقه
و اهم قرار ان اى مسئول حيغلط يرتشى يهبب اى حاجه حركبه حمار بالعكس و الففه الميدان و الشعب يهتف و يقول من ده بكره بقرشين
و حغير ام الشرطه و اسميها العسس او الدرك حاجه كده تفكرنا بايام زمان ايام الخير
و امن الدوله او الامن القومى ده بقى حا نسميه البصاصين و مفردها بصوص صغير
صباخ الفل يا ريس صباح الفل ياكبير
بص بقي يا كبير انا جحا يعنى صايع و ابن بلد و محدش يضحك عليا و ناصح قوى و افهمها و هي طيره
انا كنت ناوى ارشح نفسى رئيس بس بصراحه بينى و بينك انا قولت وجع قلب و دوشه دماغ
احب اقولك كلمه اخيره امشى عدل يحتار عدوك فيك
و متخلنيش احطك فى دماغى
ليست هناك تعليقات:
إرسال تعليق