طز فى البيت وطز فى الجامع
هو ده شعار الحكومه فى موضوع الاستثمار و طبعا طز فى المثل اللى بيقول اللى يعوزه البيت يحرم على الجامعايكش يولع البيت والجامع المهم الاستثمار الاجنبى
الاستثمار المصرى فى اسرائيل افضل طبعا على الاقل حتلاقى حوافز اقتصاديه اكتر من اللى حتلاقيها فى مصر لانك فى مصر لاتعامل معامله الاجنبى
المصيبه انى كل يوم يتحرق دم امى على غيار الريق من تصريحات الحكومه رغم انى من مؤيدين الدكتور عصام شرف و حكومته و عارف ان انجازتهم لحد دلوقتى تفوق انجازات مبارك فى ثلاثون عاما
تصريح ١ : الحكومه تشجع الاستثمارات الاجنبيه
طب و الاستثمارات المصريه مفيش اخبار لسه
تصريح ٢ : الحكومه تتعهد بتذليل العقبات امام الاستثمار الاجنبى
طب و الاستثمارات المصريه مفيش اخبار لسه
تصريح ٣: الحكومه تتعهد بمسانده الاستثمار الاجنبى
طب و الاستثمارات المصريه مفيش اخبار لسه
تصريح ٤: الحكومه تتعهد بالحفاظ على الاستثمارات الاجنبيه
طب و ام الاستثمار المصرى مفيش اخبار عنه ولا ايه
اتضح ان الاستثمار المصرى بعافيه شويه
ناس بتقول انه عنده بلهارسيا وناس بتقول انه مريح شويه و ناس تانيه بتقول انه لسه صغير و ميعرفش حاجه و فى رأى بيقول ان الاستثمار المصرى اتجوز و قعد فى البيت و ناس بتقول انه مات اصلا
احنا الدوله الوحيده اللى بتشجع الاستثمار المصرى اكتر من الاستثمار الاجنبى ليه معرفش
بس اكيد ده ليه علاقه بالمثل بتاع الشيخ البعيد سره باتع
طب امثله الاستثمار الاجنبى ايه :
١ مشروعات محلات سوبر مركت تبيع سلع مستورده للمصرين علشان احنا بلد مش عارفه تودى فلوسها فين
٢ استثمارات فى المنطقه الحره فى بورسعيد لمصانع اسرائيليه لتنتج على ارض مصره و بايدى عامله مصريه و خامات مصريه و المنتج مكتوب عليه صنع فى اسرائيل
٣ استثمارات فى منتجات منعت فى بلادها
سيراميك (( مدمر للبيئه )) اسمنت (( زى اخوه السراميك بالضبط )) مصانع اسمده (( تنتج مواد سامه )) مصنع انتاج الوقود البيولجى من الطحالب (( ينتج مواد سامه فى المياه ))
٤ استثمارات هدفها تملك اراضى فى مصر و طبعا مش مطلوب منى ارغى فى الموضوع ده
فين الاستثمار المصرى من كل ده (( الرد بسهوله : البت ملهاش غير بيت جوزها ))
اقتراض من البنك الدولى و من امريكا و الاتحاد الاوربي و السعوديه و ندور نكتب على مصر كمبيالات ليه مش عارف بس العبقريه بتقول كده
طب استلف من السعوديه ليه و بعدين استورد منها عصير ب ١٠ % من حجم القرض و ٢٠ % سلع غذائيه ليه بديل مصرى ليه معرفش بس اكيد السعودى احسن و ربع القرض استثمارات فى مشاريع سعوديه فى مصر
ايه القرض اللى في كده حد يفهمنى
ايه التسهيلات اللى اتقدمت للاستثمارات المصريه
الاجابه : صفر
ايه الدعم المقدم للاستثمار المصرى
الاجابه : صفر
ايه الضمانات المقدمه للاستثمار المصرى للحفاظ على راس المال
الاجابه : صفر
ليه ؟
الاجابه : الشيخ البعيد سره باتع و ده موروث ثقافى ان الاجنبى اولى بالرعايه لان المصرى جامد و يستحمل و بعدين ده ضيف ولازم ياخد واجبه امال يقولو علينا بخله
لن يبنى مصر الاستثمار الاجنبى لانه لا يبنى وطن غير ابنائه
وياريت يكون عندنا حمله لشراء المنتج المصرى
يا رب يجى علينا اليوم اللى نعامل الاستثمار المصرى زى الاستثمار الاجنبى قبل لما الاستثمار المصرى يتجوز و يقعد فى البيت
ليست هناك تعليقات:
إرسال تعليق