لامؤاخذه ...................شكلكوا بقى .......... مبلول و بدكه

لامؤاخذه ...................شكلكوا بقى .......... مبلول و بدكه

 طبعا بدون الخوض فى موضوع ايه هو اللى مبلول و فى منه بدكه احب اقول ان المهم مين هما اللى ينطبق عليهم الوصف ده اتضح بقى و انا قاعد بتفلسف فى لحظات تجلى و ملعلع على الاخر ان فى ناس كتير قوى شكلها بقى ......... اليومين دول خد عندك مثلا التلفزيون المصرى طبعا كل لما تحصل حاجه فى ميدان التحرير يجيبوا صوره للميدان فاضى و يقولوا مافيش حاجه بتحصل اصلا ناقص يجيبوا لقطه من فيلم ابى فوق الشجره و عبد الحليم بيغنى دقو الشماسى و يقولوا مين اللى قال ان فى حاجه فى ميدان التحرير و طبعا بعد لما يحسوا انهم اتفضحوا و بقى شكلهم لامؤاخذه ب............ و ان فى قنوات تانية بتنقل الصوره حيه من هناك و ان مفيش بيت فى مصر اصلا بيتفرج على التلفزيون المصرى غير الرئيس المخلوع و هو قاعد فى شرم و اتنين تلاته مختلين عقليا برضه بيتفرجوا عليه اهو من باب انهم يحسوا ان فى حد اسوء حالا منهم و ان اللى يشوف بلوه غيره تهون عليه بلوته يجيبوا لقطه لمجموعه شباب و يقولوا عليهم بلطجيه و تبص تلاقى البلطجى من دول واقف لابس تيشيرت اديدس و بنطلون ليفيس جزمه نيكى طبعا بلطجيه و اجندات خارجيه كمان مهو لو كان وطنى كان لبس بنطلون ترجال او كستور و قميص مشجر ماركه شعبوله و تتنقل الصوره بقدره قادر الى واحد واخد فى وشه حوالى اريعين مطوه و لابس فنله حملات و يقولوا مواطن شريف بيدافع عن رجال الشرطه الغلابه و دول بقى النوع التانى من اللى شكلهم لامؤاخذه برضه يعنى هما مش قادرين يحموا نفسيهم و صورهم فى الميدان يوم ٢٨ كانت حاجه تقطع القلب و تصعب على الكافر و نص الشعب المصرى اصبح يملك تذكارات من هذا اليوم اللى واخد بدله ضابط و اللى واخد بدله عسكرى امن مركزى و اللى واخد خوذه ولا درع يعنى مش ممكن الشعب ينسى اصلا و بعدين كل كام يوم يصرخوا و يقعدوا يقولوا الحقونا المساجين بتضربنا و بيهربو و اصبحوا متخصصين فى ضرب النساء و العجائز من اهالى الشهداء و لما يشوفوا واحد من شباب الثوره يطلعو يجروا بس الشهاده لله ما بيقفوش فى وش الشباب بتاع الثوره غير لما يكونوا كتير يعنى مثلا ٥ الى ١ هى دى النسبه الى بتحكم علاقته الشرطه بالشعب و طبعا لو لقوا فرصه ينتقموا من الشعب مافيش مانع طالما ان القضاء بيحميهم و دول بقى النوع الثالث من اللى شكلهم وحش برضه تبص تلاقى الواحد من دول له هيبه كده و لابس هدومه و شنبه فى وشه يسد عين الشمس و يروح المحكمه يقول تأجيل طب تاعب نفسك ليه ماتبعت ماسج و تقول تاجيل و خلاص بس طول النهار ممرمطين الجيش وراهم يحمى المحاكمات و ده بقى برضه بقى شكله وحش بس مش حنقدر نتكلم علشان منروحش فى داهيه خصوصا بعد لما اصبحت علاقتنا بيه على وش طلاق لامؤاخذه بس نفسى اعرف ليه الجيش نزل امبابه بسرعه و جرى يحمى الاقسام فى ساعتها و جرى راح حلوان و كل مره تلاقى فتنه ولا موضوع بلطجه يجرى يلحق و يفضها سيره بس الغريب بقى ان كل مره المتظاهرين يضربوا تبص تلاقى الجيش بيعرج و هو جاى و يجيى بعد خراب ملطه بس برضه مش مشكله الواحد بيقول كله الا الجيش و محدش يقرب ولا يجيب سيره الجيش اصلا اصل جيش مصر بيقولك خط احمر يا خوفى لا يشيلوا منه كلمه خط دى عمتا محدش يقدر يسأل الجيش غير الحكومه و دى بقى برضه شكلها لامؤاخذه الشعب بيطالب بحاجات و هيا بتعمل حاجات تانية خالص ليه معرفش و كل شويه يطلعوا يقول لك مؤتمر وفاق وطنى و بعديها مؤتمر وحده وطنى و بعديها ائتلاف وطنى و اللهى انا حاسس ان العيب فى كلمه وطنى دى مش عارف ليه بتجبلى حاله هرش اول ما اسمعها من ايام المدهول على عينه الحزب الوطنى بس طبعا كله الا انهم يزعلوا شيوخ الفضائيات لامؤاخذه اللى قالوا ان المظاهرات حرام و الخروج على الحاكم حرام و ان اللى يخرج عن الحاكم ده فاسق و منيل بنيله و بعد لما الثوره نجحت طلعوا يقولوا الثوره حلوه و ادولنا حته بس تكون كبيره و كله علشان ربنا يحبكم و حسنه قليله تمنع بلاوى كتيره الغريب بقى انهم مافيش واحد منهم اتبهدل ولا اتمرمط فى امن الدوله ولا حتى حد منهم نزف من منخيره نقطه دم علشان خاطر الاسلام او المسلمين و قعدين يولولو و يقولو فلسطين و ساعة لما رحنا الحدود كانوا هما هنا قاعدين فى التكيف و لما سألنا قالك الشيخ بيدعى لكم و فى الاخر يقولك سنه يا سلام طب ما الرسول كان بيبقى اول واحد فى الجيش امام العدو اشمعنى دى مافتكرتوهاش فى السنه شكلكوا وحش لامؤاخذه طب ليه مافيش حد منهم طالب بالقصاص من قتله المتظاهرين حتى الان السؤال ده اجابته : ............... نقط و كل واحد يملاها باللى هو عايزه طب ليه ما فيش حد منهم طلب بمحاكمة قتله الاخ سيد بلال برضه الاجابه............. نقط و ده كله يطلع والاقباط يقولولك احنا مظلومين و مضطهدين فى البلد و لازم امريكا و مجلس الامن و ام سمعان البلانه يفرضوا الحمايه على مصر و ده طبعا علشان مصر الحيطه المايله و طبعا احنا عارفين الناس بتعمل ايه جنب الحيطه شوف بقى الحيطه المايلة حيعملوا فيها بقى ايه حتى الواد شاهين صاحبى طلع برضه لامؤاخذه مش عارف ليه بس اشمعنى يعنى حتيجى عليه و يبقى هو اللى عدل عمتا شكلكوا بقى لامؤاخذه .............