الثوره فين يا غجر !!!
الدستور حبر على ورق و لكن المواطن حى يرزق كلنا ايد واحده يابهجت الغريب بقى ان من ثلاثه شهور تقريبا كان شعار الشعب المصرى كلنا ايد واحده يا بهجت وطبعا بهجت اللى هو الشعب اتنيل و صدق و عملنا الثورة و راحوا الشهداء و خلعنا المخلوع و طلع الاعلام المصرى طبعا بعد الثورة يهلل و يولول و يقول انه مع الثورة قلبا و قالبا رغم ان كل الشواهد بتقول ان الاعلام هو اللى بيغتال الثورة الان وطلع المشايخ يعيطوا على الشهداء رغم انهم كلهم اجمعوا ان الثورة حرام هو مش برضه ما بنى على باطل فهو باطل يعنى لو الثورة حرام يبقى اكيد اللى ماتوا منا مش شهداء بصراحه موقف فاقع مرارتى و مش قادر انساه قالوا حنعدل الدستور و نسقط الدستور القديم الكل هتف سعتها و قال كلنا ايد وحده واحده يا بهجت و بعديها اختلف معانا طبعا الشيوخ و قعدوا يصرخوا لا لتعديل الماده الثانيه من الدستور و لو انت مسلم قول نعم و اصبح شيوخ الفضائيات يملكون مفاتيح الجنه و على الرغم من وجود الماده الثانية منذ خمسون عاما الا انها لم تثمر او تغنى من جوع لم تؤثر يوما فى قانون الا الاحوال الشخصيه اللى ماما سوزان بوظتها كلها و مفيش حد منهم هز كتافه و قال لأ عليها و رجعنا بقى لفكره الدستور ولا الانتخابات اولا اتضح ان الموضوع ما يفرقش كتير الدستور كتاب ليس مقدس و لن يفتح بعد كتابته اصلا الاهم هو القوانين التى تكفل تنفيذ الدستور و ليس الدستور حريه المواطن و حفظ كرامته نبقى محتاجين لجهاز شرطه بلا تجاوزات اذا نضع هيئه رقابيه مختصه لها صفه الضبط القضائى و باشتراك المجتمع المدنى للاشراف على عدم تجاوزات الشرطه يعنى اننا نكون سواء امام القانون لا يعطى الضابط الحق ان يتعاطى المخدرات و يمسك بمواطن بتهمه التعاطى او الاتجار اذا كنا بنطالب فى الدستور بمجانيه التعليم يبقى نعمل تعليم الاول و نضع ضوابط للتعليم و الا مجانيه ايه ان كان معندناش تعليم اصلا اذا كنا بنطالب بحريه رأى و حريه تعبير يبقى نلغى تهم الصحافه و القبض على الناس بتهم سياسيه اذا كنا بنطالب فى الدستور على حق المواطن فى العلاج يبقى نطور الجهاز الطبى الاول الدستور حبر على ورق و لكن المواطن حى يرزق
ليست هناك تعليقات:
إرسال تعليق