ارجع يا عصام يا حبيبى اهلك عايزينك
متغيب من اسبوع يرتدى بدله و كرافته و ياريته كان بيرتدى نظاره علشان كان شاف الحال وصل لايه
يعانى من فقدان ذاكره او فقدان امل او فقدان ثقه الله واعلم بس عنده حاله فقدان و خلاص
اخر مره شوهد كان من كام يوم بيلعب مع العيال فى شارع الخليج و رجع يا قلب امه ايد ورا و ايد قدام
و شوهد بعد ذلك ياكل سندوتش فلولل النظام و طعميه المجلس
طيب ولا بيهش ولا بينش و مالوش لا فى الطور ولا فى الطحين و طول عمره حنين و العيبه ما تطلعش من بقه
على من يجده ان يحضره الى العنوان التالى ميدان التحرير بجوار كنتاكى او الاتصال على رقم كنتاكى التحرير
و يقول ادينى اى حد كبير من الميدان و احنا حنيجى نستلمه
و نعلن عن مكافأه كبرى لمن يجده وجبه كنتاكى و ٥٠ جنيه علشان الدولارات كلها اتهربت بره خلاص معلش
و كمان اذا احضرته بسرعه و ما بيعيطش حتاخد اجنده خارجيه هديه و شويه عناصر مندسه
نداء الى اصحاب اقلوب الرحيمه رجعوا عصام علشان امه مصر مقطعه نفسها من العياط
و اخته ثوره فرحها كمان كام يوم على الشعب المصرى
و الوليه داخليه نفسها تبوظ الفرح وخلاص
ارجع يا حبيبى امك الى بتحبك مصر
ليست هناك تعليقات:
إرسال تعليق