حمار الثوره ماعدش بيبرطع
هسس يا عجله التنميه و كرباج ورا يا أسطى
كرباج ورا يا أسطى ياللى سايق الثوره عشان خاطرى حيات ابوك يا شيخ
الحمار تعب من جر العربية و كل القلل اتكسرت من المطبات
الثوره بقت عامله زى عربيه كارو اسمها مصر
جاررها لامؤاخذه حمار اسمه الامن و الامان و محمله قلل اسمهم الشعب
و عماله بتنطط على المطبات الى اسمهم الاخوان و السلفين و الاقباط
و كل شويه العربيه تقع فى نقره اسمها المحاكمات العادله
و القضاء و تتكعبل فى ظلطه التنميه و الامان
و تتهبد فى دحضيره الاقتصاد و فى شويه عيال رزله بتزقل العربيه بالطوب اسمهم الداخليه
هسس بقى على جنب و ننزل نشوف القلل اللى اتكسرت
هى العيال الرزله دى ملهاش اهل يلموهم ولا ايه ؟
شكله كده الحمار حزن و مش عايز يمشى ولا بقى حيبقى فى امن ولا امان و لا حتى بتنجان
استقر الحال على الرغم من ان دوام الحال من المحال
انه نبيع البلد مره اخرى بدعوى استثمار من دوله اخرى
و نطلع الحرامى مصون مع انه غرقنا فى الديون
و نشوف مصلحه جمال و علاء رغم انهم اصل البلاء
ونطرمخ فى المحاكمات و نقول انه مفيش حد مات
و نولول على عجله التنميه على الرغم من انها مفسيه
و نبكى على الامن و الامان و نقول ان الشعب لازم يرجع جبان
و ان دورنا على حق الثوار يقولوا انك يا بلطجى يا حمار
و ان سألنا على حق الغلبان يقولك ايه يعنى لو نام جعان
و لو اعتصمت يقولك بلطجى و لو اضربت يقول عربجى
و لو قلت اقعد فى البيت يقولك انت بتعلن العصيان
و لو نزلت الشارع و سكت يقولك
بطاقتك فين يا روح امك
شكلك كده مش عاجبنى و بيقول انك بلطجى
علشان ما افضلش حمار او اتكسر مع بقية القلل اللى على العربيه
انا قررت انزل و اقف فى ميدان التحرير
ليست هناك تعليقات:
إرسال تعليق