الادب فضلوه عن السلاح الميرى
النهارده روحت القسم اسأل عن موضوع التسجيل فى كشوف الانتخاب قدام القسم لقيت صول من بتوع زمان ظريف قوى و كان بيساعدنى عشان اركن عربيتى بصراحه اتخضيت و بعدين قولت فى بالى ومالو المهم انى قولت ان بعد الظن أثم لما ادخل و يارب اخرج وربنا يعديها على خير نزلت قابلنى صول تانى قبل لما اوصل للقسم ب ٢٠ متر قال لى حضرتك عايز تعمل ايه بالضبط واللهى يا جدعان الدمعه كانت حتفر من عينى لما عرفت انو كان بيكلمنى انا و بعدين قولت يمكن بيحترمنى عشان قرشين و بعد ما امشى اكيد حيلعن ميتين اهلى بحكم العاده انا مواطن و هو من الداخليه قولتله انا عايز اسجل اسمى فى كشوف الانتخاب و هنا بقى الكارثه الكبيره الصول شدنى من ايدى علشان كان فى عربيه حتخبطنى مش عارف ليه حسيت انى فى فيلم من بتوع اسماعيل يشاورلى على الباب اللى المفروض دخل منه اصل عقبال عندكوا كده القسم بتاعنا ببابين حاجة تفرح وانه داخل القسم قابلنى ملازم و قاللى صباح الخير قولت لا بقى مبدهاش وكنت بصراحة هاجرى واهرب وملعون ابو الانتخابات بس سمعت موسيقى رأفت الهجن فى ودانى وقولت لنفسى فداكى يا مصر عمتا انا منت عامل احتياطاتي ومبلغ كل اصحابى انى رايح بكرة القسم و فجأه حصل الى كنت خايف منه لقيت واحد جاى ناحيتى و بيقولى حضرتك عايز تعمل ايه كل ده وانا لسه بره القسم قولتله قالى خش جوه المكتب الرابع على الشمال متسألنيش ليه بقى المرة دى قررت انى فعلا اهرب و ام الانتخاب على اللى عايز يتهبب بس لقيت تانى موسيقى جمعه الشوال فى ودانى المره دى و اتنيلت دخلت وهى دي بقى المصيبة بجد اصلى طول عمرى فاكر ان الباب الرابع شمال ده باب الحجز قولت و وماله مش حكون اغلى من اللى راحوا علشانك يامصر بس المره دى مسمعتش اى مزيكا فى ودانى قالولى اسأل عن عم شعبان طبعا انا سمعت شعبان من هنا و افتكرت عم شعبان بتاع فيلم الكرنك وسعاد حسنى قولت لاء يعنى لاء مش للدرجه دى يا مصر لاء يعنى لاء و المره دى كل الى سمعته فى ودنى مزيكه مسلسل بئر الخيانه و قولت ايكش تولع وانا بحاول اهرب قابلنى رائد شرطه و قاللى ايه تايه ? انتا عايز تعمل ايه بالضبط قولتله قام خدنى من ايدى وماشى تانى ناحية باب القسم وانا كل الى في بالى مشهد عم شعبان و سعاد حسنى من فيلم الكرنك بس حمدت ربنا انه ماشى نحيت الباب قولت خير اكيد اخريتها شالوت و يرمينى بره القسم و ساعتها احمد ربنا و ابوس ايدى وش و قفا و ابقى اقول ربنا يسامحه و لو حد سألنى روحت ولا لاء حقول ملحقتش علشان كنت متاخر على الشغل مع العلم انى انا صاحب المصنع بس اهى حجه نتفع بردو وقف الضابط معى امام الباب يساعدنى اقراء الورقه التى يتم فيها الاعلان عن انه الانتخاب ببطاقه الرقم القومى و ليس مطلوب ان اسجل اسمى فى اي كشف و بعدها سلم عليا ونزلت بعد لما سألنى اقدر اخدمك بحاجه تانية قولتله يعنى مفيش جوه كشوف ? قالى لاء بس ممكن تتاكد لو عايز خش عند عم شعبان انا قولت لنفسى لحد كده وكفايه بس اعمل ايه الشيطان ابن الكلب غوانى ودخلت تانى قابلت اتنين من صولات او صف ضباط المهم كان عندهم مشكله مع الكلبش مش راضى يتفتح كانوا واقفين قدام مكتب عم شعبان مستنينه بردو وقفوا معايا و خلونى العب بالكلبش واللهى فرحت المهم بقى وسط ده كله الى اتكسفت اقولو فى الاول ان كل واحد من الضباط و صولات يشوفنى يسلم عليا و يبوسنى هو ده الى خلانى اشك انهم بحضرونى لعم شعبان سالت وخرجت من القسم معرفش ازاى و وصلت لاول صيدليه قست الضغط و النبض و اخدت حبايه مهدئ و مرمى فى البيت اهو دلوقتى علشان امسك اعصابى اصلى مش مصدق انى بجد كنت فى القسم واللهى ده بجد قسم العجوزه محافظه الجيزه ولاتعليق
ليست هناك تعليقات:
إرسال تعليق