اعترافات المتهم بحرق نيابة مرور العجوزه
النهارده و زى كتير من المغفلين امثالى طبعا رحت اجدد رخصة عربيتى المهم دى حاجه عاديه صحيت الصبح و صليت ركعتين لقضاء الحاجه و دعيت
مش انى اخلص الرخصة بس انى ضغطى ميعلاش ولا تجيلى ذبحه صدرية ولا حاجه
بعد لما عملت تمارين الصباح زى كده بتاعه الاحماء فى المنتخب
ملحوظه التمارين دى مهمه للتعامل فى اى مصلحة حكومية علشان ميجيلكش شد عضلى او اصابه وانت بتلف زى النحله فى المصلحه
اتوكلت على الله و رحت على مرور العجوزه قابلنى واحد على الباب و قالى بين السرايات
انا بصراحه مفهمتش من الاول بس محبتش شكلى يبقى حمار
اتشجعت و قولت اصلحله المعلومه و اهو كله بثوابه
قلتله لا يا حبيبى ده مرور العجوزه قالى روح مرور بين السرايات اصل المرور هنا محروق من ايام الثوره و..........رغى كتير ملخصه انه ملعون ابو الثوره
سيبته بيتكلم و مشيت و طلعت على بين السرايات
وقفت على الباب و شوفت الشعب المصرى الحبوب كله واقف جوه
طبعا و اكمنى عبقرى عرفت ايه مشكلة الشعب المصرى
المشكله بسيطه الموظف فعلا شغال و بسرعه و مفيش حاجه اسمها شرب شاى هناك و ناس زى الفل و الشعب الحبوب كله بيحاول يقف فى طابور بس المشكله ان مصر محتاجه تخس ١٠ كيلو و كل حاجه تبقى بخير
اصل كل مواطن واقف و كرشه قدامه ضارب فى قفا الى واقف قدامه و اللى واقف قدامه ضارب من حته تانيه ضاربه فى وش الى وراه فالنتيجه انه بين كل اتنين وقفين يوجد شخص يقف مثل علامه الاستفهام بسبب تقوصات و انحناءات مريبه فى تكوين من حوله المهم انه تحول من مرور بين السرايات الى مرور الثدييات
الشعب كله ملتحم ليشكل كتله واحده كل ده مش مشكله وماله الواحد كان فى الميدان مبيفكرش فى الحاجات دى خالص
الغريب وسط ده كله هو كم الاوراق المطلوبه علشان فى الاخر تاخد كرت صغير مكتوب عليه رخصه تسير سياره
شهاده بيانات - شهاده مخالفات - صوره من البطاقه و الرخصه و لو فى شهادات ميلاد الام و الاب مافيش مانع و طوابع شرطه رغم انى مش عارف ايه لزمتها ايصال دفع و ايصال دفع تانى
و تأمين اجبارى صحيح انه لا يوفر اى نوع من انواع التأمين بس بردو حتدفعه عصب عن عين اهلك و نموذج فحص للسياره و تشترى طفايه حريق جديده و المهم الوصل بتاعها
عارف حتقول ايه القديمه موجوده
ماش طز بردو حتشترى دى اتفاقات يا مواطن انت عايز تبوظ النظام ولا ايه - و دوسيه تشتريه من على الباب و تروح للموظف اللى فى اخر الدنيا علشان يدخل البيانات على الكمبيوتر و طبعا ده مايغنيش عن الاوراق و على رأي المثل من فات قديمه تاه
كل حاجه من الى فاتو دول فى مكان شكل يعنى لو حسبنا المسافه اللى بتمشيها علشان تعمل الكلام ده كله تكتشف انك عملت مجهود اكبر من اللى عمله ابو تريكه فى كاس الامم٢٠٠٦
بس مافش حد يسقفلك و او انك لو بعت العربيه و رحت كل يوم الشغل مشى حيكون نفس النتيجه
يعنى من الاخر حوالى ١٥ ورقه فى دوسيه علشان اطلع رخصه ده طبعا غير الاوراق الداخليه اللى ما بتشوفهاش زى مثلا اصل وصل الدفع بتاع كل مرحله من دول
يعنى باختصار ١٥ * ١٠٠٠٠ سياره مثلا يبقى المجموع ١٥٠٠٠٠ ورقه قابله للاشتعال طبعا
يعنى حوالى ٥٠٠ شجره من الحدم المحترم
او الف كتاب مدرسي ينفع العيال بحاجه
تفتكرو بقى سبب حرق مرور العجوزه اهمال و لا تخلف و روتين مستفز ولا فعلا عمل تخريبى من ايام الثوره
ليست هناك تعليقات:
إرسال تعليق