يا كبير الحقنى قبل لما اتحول لحمار

صباح الفل يا كبير المره دى انا مش جيلك علشان اقولك انا المواطن انا بصراحه حاسس انى احمد زكى فى فيلم البرئ هو فى ايه يا كبير انا كل شويه واخد بعضى زى الاهبل لامؤاخذة و رايح فى ناحيه مره شمال و مره يمين و انا يا خويا لا كان ليا فى الثور ولا فى الطحين مره يطلعلى عفريت فى العلبه دى اللى اسمها التلفزيون و يقولى فلان صح و فلان غلط و بعدين يطلعلى بقى عفريت تانى يقولى حاجه تانية خالص و ان الراجل الاولانى ده مختل عقليا اصلا من الاخر يا كبير الحقنى قبل لما اتحول لحمار و ساعتها يمكن استحلى موضوع الحموريه ده و انهق بقى و اهو انضم للى بينهقوا على كل لون انت عارف يا كبير انا بقيت بخاف من التلفزيون يا عم ده انا كل لما اتنيل بس و اغلط و افتحه ينوطوا عليا العفاريت و هاتك يا اكلان فى دماغى و الغريبة بقى يا كبير انهم كلهم اللهم احفظنا و احفظ اولادنا بيطلعوا بالليل ده انا حتى بقيت محرج عليهم فى البيت حد يفتح التلفزيون و خصوصا وانا كل شويه ارجع البيت الاقى الوليه واكله دماغى بموضوع جديد و اصل فلان طلع فى التلفزيون و قال و عاد و بعيد عنك كل يوم بحال شكل بس و اللهى مسليه و اهو برضه التغير مطلوب عارف يا كبير انا قولت اخطف رجلى و اهو اترزع على القهوه مهو اصل بعيد عنك الحبسه وحشه المهم وانا قاعد و بسمع كوكب زحل الى بيغنى اغنيه انا مش عارفنى انا تهت منى لقيت واحد جاى عليا زى القضاء المستعجل و معاه ورقتين و بيقولى بطاقتك بينى و بينك انا فى عقل بالى قولت يمكن شرب الشاى اتمنع ولا حاجه المهم طلع بتاع حزب اسمه حاجه كده زى بتوع بره مانا اصلى مثقف و اعجبك قوى طب عايز البطاقه ليه يا عم الحج قال علشان اضمك معانا قولت فى عقل بالى اخد فكره و اشترى بكره وماله اهو اول مره حد يسألنى عن البطاقه و مايكنش فى الكمين واللهى و ما ليك عليا يمين يا كبير حاسيت كده المهم اخدت الورقه منه و قولت اقراها لقيت اهداف الحزب حريه صحافه و تعليم و صحه و مرور و شويه كلام ملوش اى علاقه بحزب ولا حتى جمعيه استهلاكيه قوم انا اتسحبت من لسانى و سألت الراجل اللى اصلا معرفوش طب الكلام الكبير ده ياترى بقى حتنفذوه بالاشتراكيه و لا الليبراليه و الا الرأس ماليه والا ايه و فجأة و على حين غره زى كده الافلام بتاعه بره الراجل اللى كان قدامى اتشفط و بصيت لقيت واحد تانى خالص و الشاى اتسحب و بقيت بشرب ينسون رغم انى مبطقش الينسون اصلا و واحد قاعد قدامى و بيقولى انا عندى الحل و دخل بيا فى سكة الاخره و ماحدش ضامن عمره و انت بقى كلك نظر قولت و ماله نسمع من الراجل ده برضه و اهو برضه ناخد فكره و نشترى بكره قوم سألته نفس السوأل ده طبعا قبل ما يهزئ اللى خلفونى و يقولى بصوت مفتخر و عميق رأسماليه ايه و اشتراكية ايه يا كلب احنا حنعمل فكر جديد بصراحه اتشجعت و سألته عباره عن ايه الفكر الجديد ده ؟ قام من مكانه و اتنطر زى الى اتكهرب و قالى معرفش انت بتجادل كتير ليه انت علمانى والعياذ بالله بصراحه انا معرفش يعنى ايه علمانى بس عرفت انها اكيد شتيمه و فاجأة الراجل مشى احلى حاجه انه خد الينسون معاه واللهى فرحت طب عليا واحد بقى خنفس و نزلى واحد نسكافيه رغم ان الدنيا ليل و انا مبشربوش و قالى الحل فى الديموقراطيه و العلمانيه مش عيب مش معنى انك علمانى انك ضد الدين بالعكس انت لو انضميت معانا حتلاقى الحزب بتاعنا بيخدم كل اهدافك احنا بقى حزب اشتراكى علمانى يسارى يمينى ديموقراطى راسمالى معتدل بس بقى لحد هنا و انا بقى اللى جريت بصراحه بس وانا خارج من القهوه الواد القهوجى جيه و قالى الحساب ٢٥ جنيه اتنين شاى و اتنين ينسون و اتنين نسكافيه و الراجل بتاع الينسون كان و اخد سحلب و حمص الشام قبل كده لا تعليق الحقنى يا كبير